Iyaqhubeka nokushosholoza inqola yePirates

Sekhukhune United (0)1

Orlando Pirates (1)2

I-Orlando Pirates yendlalele umdlalo omqoka neMamelodi Sundowns ngokwehlula iSekhukhune United koweBetway Premiership e-Old Peter Mokaba Stadium, ePolokwane, ngoLwesithathu ebusuku.

Amagoli awenze iPirates ashaywe nguDeon Hotto usanda kuqala umdlalo noMakhehleni Makhaula ekuqaleni kwesiwombe sesibili. EleSekhukhune libekwe enethini nguLinda Mntambo kwesesibili.

EZimnyama ziye kulo mdlalo zishayela phezulu kulandela ukwehlula izimbangi zawo, iKaizer Chiefs, koweligi ngempelasonto edlule. Bezikudinga ukunqoba ukuze zizobhekana neMamelodi Sundowns ngempelasonto engashintshile amaphuzu ayisithupha ezisele ngawo kulabo mpetha beligi. Lo mdlalo ungase ucacise okuningi ngomjaho wesicoco seligi okubukeka uzoshuba phakathi kwala maqembu. IPirates eyagcina ukuwina iligi ngo-2011, isemkhankasweni wokuqeda ukukhonya kweSundowns esiyiwine amahlanda ayisikhombisa kulandelana. EZimnyama seziwine imidlalo eyisihlanu ilandelana emiqhudelwaneni eyahlukene.

Enkundleni, iPirates iqale umdlalo ngegiya eliphezulu, icindezela iBabina Nokho. Asheshe avuleka amasango ngesikhathi uHotto eshaya phakathi i-free kick ngomzuzu wesihlanu. Maphakathi nesiwombe sokuqala, umqeqeshi, uJose Riveiro, uphoqekile ukwenza ushintsho kulandela ukulimala kukaThabo Sesane, indawo yakhe yathathwe nguThapelo Xoki. Nakuba eZimnyama beziyifaka ingcindezi esiwombeni sokuqala kodwa kuyiwe ekhefini kuyiSekhukhune ehlasela kangcono, kubhoke kakhulu uKeletso Makgalwa noSipho Mbule esiswini.

Esiwombeni sesibili, iPirates ibuye no-Evidence Makgopa ongene endaweni kaTshegofatso Mabasa othole ikhadi eliphuzi kwesokuqala. Emuva kwemizuzu emibili, uMakhaula ungqofele phakathi ibhola elide ebelithunyelwe ebhokisini nguHotto. Cishe lokhu kuwakhinyabeze wonke amaqhinga eSekhukhune eqale yenza amaphutha emuva futhi isihluleka nokuphatha ibhola ngokukhululeka. Nokho emuva kwezinguquko ezimbalwa, ibuyile yazinza emdlalweni. Ngomzuzu ka-77 uMntambo obeqale ebhentshini, uqobele phakathi ibhola ebelishaywe nguVuyo Letlapa lashaya ipali labuyela enkundleni.