ALINDELE lukhulu amaqembu ahlukene ezepolitiki enkulumweni ebhekiswe esizweni, ezokwethulwa nguMengameli wezwe uCyril Ramaphosa, kusasa ebusuku ePhalamende. isithombe: Ayanda Ndamane / Independent Newspapers
ALINDELE lukhulu amaqembu ahlukene ezepolitiki enkulumweni ebhekiswe esizweni, ezokwethulwa nguMengameli wezwe @CyrilRamaphosa, ngoLwesine ebusuku ePhalamende. #SONA
Izinga eliphezulu lokungasebenzi, ukukhula komnotho, ukwakha amathuba emisebenzi, indlala esabhuqa abantu, ukuhoxiswa kwamasosha akuleli e-DRC, ngezinye zezinto amaqembu azilinde ngabomvu kule nkulumo.
Kulindeleke ukuthi uRamaphosa akhulume nangemithetho asanda kuyisayina equbule imvunge kwamanye amaqembu ayingxenye kahulumeni wokubambisana.
Umthetho wakamuva asanda kuwusayina osuse imvunge owokuthathwa komhlaba nezakhiwo.
Umholi weqembu i-BOSA uMnuz Mmusi Maimane, uthe balindele lukhulu enkulumweni kaRamaphosa.
“Silinde ukuthi amemezele izinhlelo ezibambekayo abazozenza kuleli hlandla likahulumeni wokubambisana, besebenzisa isabelomali ukuthuthukisa abantu bakuleli. Sifuna ahoxise namasosha akuleli ase-DRC njengoba kunangu-14 asale enkundleni.”
UNkk Khusela Sangoni-Diko we-ANC, uthe nakanjani uRamaphosa uzomemezela izinhlelo zokuphucula impilo yabantu bakuleli.
Uthe kuzoba nomhlangano omkhulu we-G20 ngasekupheleni konyaka, ngakho kumele amemezele izinhlelo zokuqhubeka kwezwe ukwenza kahle njengoba libambisene namanye amazwe.
“Uhulumeni unezinhlelo zokulungisa isimo esithinta abantu abangasebenzi. Eyokukhulisa umnotho ukuze abantu bathole imisebenzi ngenye yezinto ezoba seqhulwini enkulumweni ebhekiswe esizweni,” usho kanje.
UNksz Karabo Khakhau okhulumela i-DA, uthe balindele ukuzwa uhlelo lokukhuliswa komnotho ukuze abantu bakwazi ukuthola imisebenzi.
“Indlala ebhuqa abantu, izinga eliphezulu labangasebenzi nezinye ngezinye zezinto esilindele ukuzwa kabanzi ngazo,” kusho uNksz Khakhau.
Uveze ukuthi umholi we-DA uMnuz John Steenhuisen, uzobalula amaphuzu abawalindele kule nkulumo namhlanje.
Iqembu uMkhonto weSizwe lihlele ukwenza eyalo inkulumo ebhekiswe esizweni namhlanje kodwa yayihlehlisela isonto elizayo.
UMnuz Wouter Wessels we-FF Plus, uthe balindele uRamaphosa ukuthi akhulume ngezinto ezizobumba isizwe ngoba kunabantu abakuleli abangazizwa beyingxenye yezakhamuzi.
“Uwumengameli wawo wonke umuntu, hhayi oweqembu elithile ngakho silindele ukuthi abumbe isizwe. Sifuna akhulume ngezinto ezizoletha ithemba kwabahlala kuleli, abazibona bengeyona ingxenye yezakhamuzi. Nendaba yokushoda kwemisebenzi, nokukhula komnotho ngezinye zezinto esizibheke ngabomvu.”
UMnuz Brett Herron we-Good Party, uhambe emazwini ozakwabo wathi balindele izinto eziningi kuRamaphosa ikakhulu ekutakuleni ababhuqwa yinkemane.
UMnuz Athol Trollip we-ActionSA, uthe abanalo ithemba kule nkulumo kaRamaphosa ngoba isimo asikashintshi selokhu kwangena uhulumeni wokubambisana.
Related Topics: