UMNIKAZI weRoyal AM uNksz Shauwn Mkhize emdlalweni waleli qembu neGolden Arrows eHarry Gwala Stadium, ngomhla ka-26 Novemba 2024 ©Muzi Ntombela/BackpagePix
AKUCACI kahle ngekusasa leqembu likaNksz Shawn Mkhize nendodana yakhe u-Andile Mpisane, iRoyal AM, ngemuva kokuthi inkantolo ichithe isicelo sabo sokunxusa umlawuli owengamele iqembu nenye impahla kaNksz Mkhize eyashaqwa yiSars, ukuba akhiphe incwadi eqinisa idolo iNational Soccer League ukuthi lingaqhubeka nemidlalo yalo yale sizini.
Ngomhla ka-9 Meyi 2024 iNkantolo eNkulu eMgungundlovu yanikeza uSars imvume yokushaqa impahla yeShandi Trust okuyimvume eyaqinisekiswa iNkantolo eNkulu yaseThekwini ngoNovemba 2024 ivuna iSars ekushaqeni impahla yabamangalelwa abangu-23, okukhona kubo iShandi Trust neqembu lebhola iRoyal AM Football Club okulawulwa uNksz Shawn Mkhize.
NgoDisemba 2024, umlawuli okunguyena owengamele leli qembu njengoba lingaphansi kwempahla eyashaqwa uSars waba nomhlangano nabaphathi beqembu ukuxoxisana kabanzi ngesimo sezimali seqembu ukubona ukuthi lizokwazi ukungahlangabezana nezibopho zalo zesikhathi esizayo zemidlalo ka-2024/25. Ngemuva kokuxoxisana, isimo saleli qembu sezimali sabikelwa abeNational Soccer League (NSL).
Ngenxa yezinselelo zezimali eqenjini, ngomhla ka-22 Januwari nonyaka i-NSL yamisa yonke imidlalo yeRoyal AM Football Club yesikhathi esizayo.
Ngenxa yokumiswa kwemidlalo, leli qembu lafaka isicelo esiphuthumayo enkantolo ngomhla ka-29 Januwari nonyaka lifuna ukuba kuphoqwe umlawuli weqembu akhiphe incwadi yokududuza i-NSL, eqinisekisa ukuthi iqembu linamandla anele ezimali ukufeza imidlalo yayo yeligi.
Isicelo siphinde safuna kubuyekezwe isinqumo saphambilini somlawuli weqembu sokungafuni ukukhipha le ncwadi njengesingenawo umqondo nesingekho emthethweni. Ngakolunye uhlangothi, leli qembu licele inkantolo ukuthi iphoqe i-NSL ukuthi ilivumele lidlale ingxenye esele yemidlalo yeligi yebhola neyeNedbank Cup.
Ngokwesitatimende esikhishwe yiSars ngalolu daba, le nhlangano, umlawuli obhekelele leliqembu kanjalo naNSL basiphikisile lesi sicelo.
“Ngomhla ka-5 Febhruwari, inkantolo isichithile isicelo saleli qembu ngokuthi lihlulekile ukuveza isimo esiphuthumayo ngokuhambisana nemigomo yokusebenza kwenkantolo,” kusho iSars ngesitatimende.
Ngaphezu kwalokhu, inkantolo iveze ukuthi leli qembu lizifake lona ngaphansi kwesimo esiphuthumayo ngokuhluleka ukuhlela ngendlela ngokuqonda isimo salo ngemuva kokuthi umlawuli ehluleke ukukhipha incwadi ebheke kuNSL.
Related Topics: